Tenglar
Fréttir
11.3.2010
Eldey óhölt og nýtt hross í þjálfun
Skemmtileg sumarmynd - Eldey litla alveg búin á því eftir hlaup fyrir myndatöku.
Ég og Spóla í bakgrunni.
Frumraun mín í hrossaræktinni, Eldey litla, sótrauð tvístjörnótt sem er uppáhaldsliturinn. Vonandi er meira ''uppáhalds'' í þessari litlu hryssu, en það kemur í ljós í framtíðinni.
Ég fékk svo svar frá Guðlaugi Antonssyni ráðunaut þar sem hann sagði að Easy Walker skeifurnar væru því miður ekki löglegar fyrir dómi og þyrfti að athuga reglurnar betur vegna hestvænna skeifna. Það tekur þó svolítinn tíma að endurgera og yfirfara reglurnar en vonandi verður það gert fyrr en seinna. Stilling er því komin á gömlu skóna en er á botnum til að dempa aðeins höggið fram að síðustu járningu fyrir dóm.
Björt í góðum gír.
Svo er ég komin með annað hross í þjálfun en það er Tývarsdóttirin Björt frá Kjartansstöðum. Björt er flugrúm og viljug með mjög gott brokk og tölt, mjög hreingeng með góðan fótaburð. Hún er mjög næm og svarar vel ábendingum, geðgóð og blíð og frábær í umgengni.
Hún er til sölu og mun ég kynna hana hér betur síðar. Hún á þónokkur alsystkini þar sem það hefur reynst vel að para saman Tývar og hryssuna Lindu frá Kirkjubæ, út hafa komið úrvalsreiðhross og mjög efnileg ræktunarhross - eins og hryssan Krúna sem er móðir Sóta (stóðhestsefni sem ég notaði í fyrra) og hryssunnar Tindru sem myndband er af á blogginu Hugleiðing um Ternu frá Kirkjubæ.
Hún er til sölu og mun ég kynna hana hér betur síðar. Hún á þónokkur alsystkini þar sem það hefur reynst vel að para saman Tývar og hryssuna Lindu frá Kirkjubæ, út hafa komið úrvalsreiðhross og mjög efnileg ræktunarhross - eins og hryssan Krúna sem er móðir Sóta (stóðhestsefni sem ég notaði í fyrra) og hryssunnar Tindru sem myndband er af á blogginu Hugleiðing um Ternu frá Kirkjubæ.
Stutt myndband af Björt frá haustinu 2008 þar sem hún er ójárnuð og vel feit eftir sumarbeitina.
Björt er til sölu á sanngjörnu verði og áhugasamir geta haft samband en hryssan er á húsi í Víðidal. Svo er ég bara að þjálfa Stillingu eins og brjáluð því ég reikna með að láta sýna hana á kynbótasýningunni sem haldin verður í Víðidal um miðjan maí. Alltof stutt! Jæja, vona það besta, gera sitt besta og búast við því besta... það er líklega það besta, heheh.
Með bestu kveðju,
Linda Karen
2.3.2010
Glæsileg stóðhestsefni til útleigu
Keimur í sveiflu síðasta vor
Þrír efnilegir stóðhestar á fjórða vetur fást leigðir frá Kjartansstöðum í sumar. Ef einhver er að leita að mjög efnilegum stóðhesti til að para við hryssur sínar næsta sumar er vert að skoða eftirfarandi ungfola nánar.
Keimur, þriggja vetra vor 2009
IS2006182337 - Keimur frá Kjartansstöðum
Faðir: Kraftur frá Bringu - aðaleinkunn 8,55. Heimsmeistari í fimmgangi.
Móðir: Tryggveig frá Kjartansstöðum. Ósýnd. Undan Víkingi frá Voðmúlastöðum (10.0 fyrir tölt) og ræktunargullinu Ternu frá Kirkjubæ.
Litur: Rauðstjörnóttur
Kynbótamat: 114
Keimur í stuði síðasta vor, þá þriggja vetra
Keimur í stuði síðasta vor, þá þriggja vetra
Keimur er í tamningu og gengur vel með hann, viljugur og mjög fús að vinna með manninum. Hann er mjög eðlishágengur, mjög geðgóður, stór og myndarlegur hestur. Sköpulag gott, háar herðar, mjög fallegur frampartur. Líkur Krafti föður sínum að mörgu leiti, sérstaklega hvað varðar fótaburð. Sinnti hryssum sumarið 2008.
Myndbönd af foreldrum:Kraftur á heimsmeistaramóti 2007.
Tryggveig frá Kjartansstöðum í tamningu á sínum tíma, knapi Jóhann Skúlason.
_____________________________________________________________
Þórketill frá Kjartansstöðum, á þriðja vetur - mynd tekin snemma vors 2009.
IS2006182340 - Þórketill frá Kjartansstöðum
Faðir: Töfri frá Kjartansstöðum
(Aðaleinkunn 8,45 - kominn með rétt til 1. verðl. fyrir afkvæmi)
Móðir: Þota frá Hólum
(Aðaleinkunn 8,14 - undan Kolfinni frá Kjarnholtum og Þrá frá Hólum).
Litur: Brúnstjörnóttur
Kynbótamat: 117
Þórketill hefur lofandi hreyfingar, m.a. á stökki, en Töfraafkvæmi virðast flest geta borið sig mjög glæsilega á þeim gangi í miklum burði.
Þórketill er léttbyggður hestur, rúmur og glaður í sinni.
Mynd tekin fyrir um ári síðan.
Mynd síðan vorið 2009, þá á þriðja vetur
Þórketill er mjög fríður og faxprúður hestur, líkist Töfra föður sínum. Alhliða hestur. Viljugur og hágengur. Mjög geðgóður, ljúfur og frábær í umgengni. Sköpulag er gott, háar herðar, frampartur góður. Lofandi stóðhestsefni. Sinnti hryssum sumarið 2008.
Myndir af foreldrum:
Töfri frá Kjartansstöðum, 9,5 fyrir tölt, hægt tölt, stökk og fegurð í reið.
Þota frá Hólum, 8,40 fyrir hæfileika
________________________________________________________________
24.2.2010
Fréttir af Stillingu, skeifunum og fleira
Stilling og ég síðasta vor.
Nú gerir maður ekki annað en að læra fyrir lokapróf og þjálfa Stillingu Smáradóttur sem hefur gengið hreint ágætlega. Hún hefur tekið miklum framförum en margt er enn eftir. Fhoenix hnakkurinn hefur reynst mjög vel og erum við stöllur báðar sáttar við hann, hjálpar mikið til við rétta ásetu og gefur mikinn stuðning - svo er hann mjög þægilegur enda sætið úr sama efni og Tempur heilsurúmin! Hann mætti þó vera aðeins dýpri til að henta fleiri gerðum af bökum og hef ég bent framleiðendunum á það.
Easy Walker - Nike Air fyrir hesta
Easy Walker skeifurnar hafa einnig gert frábæra hluti og entist fyrsta járning í 7 vikur en Stilling hafði þá verið hreyfð 4-5 sinnum í viku, oftast í löngum túrum. Skeifurnar voru líka alveg á síðasta snúning enda jörðin afar hörð og mun meiri núningur en ella. Gat hæglega farið yfir hörðustu vegi dag eftir dag án þess að það sæist á fótum hryssunnar en oft hefur hún verið viðkvæm undir slíku álagi á járnskeifunum, óð yfir allt án þess að hlífa sér nokkuð núna. Gef Easy Walker því toppeinkunn hvað það varðar, hryssan varð líka öruggari með sig og laus við að druslast með lappirnar einhvern veginn þegar hún er orðin lúin eins og hún gerir með járnið. Tær snilld.
Stilling á skeifunum góðu
Ég er þó að lenda í vandræðum í seinni járningunni því hún stígur núna fyrst niður á tánna heldur en niður á hælinn með framfótum sem er óeðlilegt og gefur í skyn að eitthvað sé að - held að það sé ekki nóg pláss fyrir þunna boltann sem settur var í skeifuna undir hælnum til að halda sköflunum inni í skeifunni, þarf að pússa pláss í hófinn fyrir hann betur næst þegar ég læt járna. Ég er reyndar búin að taka skaflana úr því jörðin var svo hörð og hryssan var eins og á háhæla skóm... og nú snjóar... nú sér maður eftir því að hafa gleymt að Ísland er og verður allltaf... Ísland!
Held að þetta með boltann undir hælnum útskýri fótaburðarleysið sem hefur hrjáð hana undanfarið, ekki gott að hlaupa með stein í skónum og labba á tánum. Sést mjög greinilega þegar maður horfir á hana hlaupa, teygir tánna fram og reynir að lenda fyrst á henni..verð að skoða þetta sem fyrst. Hlakka til að járna hana upp, væntanlega í byrjun mars.
Ég er búin að hafa samband við Guðlaug Antonsson,
hrossaræktarráðunaut til að forvitast um hvort ég megi nota
skeifurnar fyrir dómi en þær passa m.a. ekki við eitt atriði í
reglum um kynbótadóma - þ.e. þær eru þykkari en
venjulegar járnskeifur. Einnig eru þær með brú undir hælnum,
eru ekki opnar í endann eins og járnskeifur sem er mögulega
ekki leyfilegt. Breyta þarf reglunum þar sem þær gefa í skyn
að skeifur úr öðru efni megi vera notaðar - en ef um
gerviefni er að ræða þá verður það að vera aðeins þykkara
en 8 mm (eru 15 mm) til að endast á við járnið, það gefur
auga leið. Það ætti að vera í lagi þar sem þær eru svo miklu
léttari. Reglurnar þarfnast uppfærslu til að gefa hestvænni
skeifum möguleika.
Stilling lítur mjög vel út og orðin nokkuð hraust þó margt vanti enn uppá. Brokkið hennar hefur verið frekar viðkvæmt alla tíð en núna er það orðið mun betra og orðið nokkuð stöðugt og gott, er farin að geta pressað hana á því án þess að hún fari að tölta. Einnig er galopið fyrir skeið, væri nóg að hleypa og gefa henni ábendingu og hún myndi renna í skeiðið - en því þori ég nú ekki enda gæti ég farið með hana í vitleysu, kann lítt á skeiðið. Það er margt gott komið en margt eftir eins og alltaf. Er bara fegin með hvað hún lítur vel út í byrjun mars en fita hefur alltaf verið smá vandamál hjá henni... en hreyfingin er málið! Gef henni 6 kg viðhaldsfóður og fóðurbæti og hreyfi 4-5 sinnum í viku og það hefur slimmað hana mjög mikið, hef ekkert skorið niður við hana í fóðri enda væri það fásinna - ef maður er í líkamsrækt til að ná árangri verður maður að borða eðlilega til að tapa ekki orku. Er algerlega á móti svelti sem er fóðurgjöf undir 5 kg á dag (undir viðhaldsfóðri fyrir hest á húsi í mjög lítillri eða engri brúkun), sumir gera þetta við feit hross og hreyfa þau svo ekki nema 1-3 í viku sem getur ekki verið vænlegt til árangurs né gott fyrir hestinn. Hann þarf sína næringu og verður bara svangur og daufur. Hreyfing og gott matarræði gildir fyrir bæði dýr og menn (enda erum við öll bara dýr heheh), engin töfralausn er til og enginn myndi vilja svelta sig til að grennast!
Tývar í haust
Síðan hans Tývars, www.tyvar.net, er komin með myndbönd og ljósmyndir af 23 afkvæmum hans sem ætti að gefa gott yfirlit yfir hann sem stóðhest. Afkvæmin eru flest undan ágætum reiðhryssum, fáar gæðingshryssur hafa mætt til hans - en þó er árangurinn sannarlega góður. Það fer sífellt að styttast í vorið og mig dauðlangar að halda báðum hryssunum mínum og þar sem ég er með Tývar á leigu þá mun ég sannarlega nota hann enda hestur sem ég kann ákaflega vel við, sannkallaður snillingur. Fólk hefur verið að hafa samband út af honum enda er tollurinn á mjög góðu verði og það sama má segja um hagagjaldið. Trúi því að við munum ná að fylla hjá honum og fer ég brátt að píska hana Maríu Dís, tamningamann á Kjartansstöðum til að þolþjálfa hann vel enda fær hesturinn sko ekkert smá stykki til umráða í sumar.
Þá eru það lokaprófin....
Með bestu kveðju,
Linda Karen
Flettingar í dag: 73
Gestir í dag: 20
Flettingar í gær: 124
Gestir í gær: 59
Samtals flettingar: 48213
Samtals gestir: 17340
Tölur uppfærðar: 17.3.2010 19:13:58